លក្ខណៈពិសេស ៧ ប្រការរបស់បុគ្គលដែលមានភាពធន់

10,145

ភាពធន់គឺជាសមត្ថភាពនៃការត្រលប់ទៅភាពដើមវិញបន្ទាប់ពីគេពត់ សង្កត់ ឬដាក់សម្ពាធ។ វាជាសមត្ថភាពងើបឡើងវិញចេញពីជំងឺ ការធ្លាក់ទឹកចិត្ត ឬការរងគ្រោះកាច។ តើអ្នកនឹងដោះស្រាយយ៉ាងណា បន្ទាប់ពីអ្នកបាត់បង់អ្វីៗទាំងអស់នៅថ្ងៃនេះ? តើអ្នកគួរបោះជំហ៊ានបន្ទាប់យ៉ាងម៉េច? តើអ្នកអន់ចិត្ត បាក់ទឹកចិត្ត និង ខឹងសម្បារដល់ពេលណា? តើអ្នកក្រោកឈរឡើងវិញ និង ចាប់ផ្តើមម្តងទៀតដោយរបៀបណា? តើអ្នកមានភាពធន់កម្រិតណា? អ្នកអាចដោះស្រាយវិបត្តិបានដែរឬទេ? តើអ្នកអាចរៀនសូត្រចេញពីការខកចិត្តទាំងឡាយ និង ចាប់ផ្តើមឡើងវិញបានទេ? តើអ្នកត្រូវធ្វើអ្វីខ្លះ?

ចំណុចចាប់ផ្តើម គឺអ្នកត្រូវមានវិន័យខ្លួនឯងឲ្យបានច្រើន។ អ្នកត្រូវនិយាយអំពីភាពវិជ្ជមានទៅកាន់ខ្លួនឯងឲ្យបានច្រើន ដើម្បីបញ្ចូនថាមពលសម្រាប់ចាប់ផ្តើមឡើងវិញ។ អ្នកត្រូវប្រមូលផ្តុំអារម្មណ៍ដើម្បីបង្ការសំឡេងអវិជ្ជមានទាំងឡាយកុំឲ្យចូលក្នុងខ្លួនអ្នក។ វាត្រូវការបង្កើតវិន័យជាច្រើនដើម្បីស្តារតុល្យភាពចេញពីសេចក្តីភ័យខ្លាចនិងខកចិត្ត ដោយយកចិត្តទុកដាក់ថា​ អ្នកធ្លាប់ធ្វើរឿងនេះ និងជឿថាអ្នកអាចធ្វើឡើងវិញបាន។

មិនថាការបាត់បង់កន្លងមកទាក់ទងនឹងអ្នក ឬអត់ ប៉ុន្តែអនាគតជោគជ័យរបស់អ្នកគឺទាក់ទងនឹងខ្លួនអ្នកទាំងស្រុង។ វាទាមទារយ៉ាងខ្លាំងក្នុងការពឹងអាស្រ័យលើខ្លួនឯង ជំនួសឲ្យការស្តីបន្ទោសអ្នកដទៃ។ អ្វីដែលបានកើតឡើង វាកើតឡើងរួចទៅហើយ អ្វីដែលសំខាន់គឺថា អ្នកត្រូវបន្តជីវិតរបស់អ្នក ហើយចាប់ផ្តើមឡើងវិញ។ ប្រសិនបើអ្នកបរាជ័យម្តងទៀត អ្នកត្រូវមានសេចក្តីក្លាហានចាប់ផ្តើមឡើងវិញ។ វាទាមទារឲ្យមានការលើកទឹកចិត្តខ្លួនឯងខ្លាំងមែនទែន។ អ្នកត្រូវមានជំនឿក្នុងចិត្តអ្នកថា អ្នកមានជំនាញ ទេពកោសល្យ និងភាពខ្លាំងក្នុងការចាប់ផ្តើមឡើងវិញបាន។

បណ្តុះអត្តចរិតធន់នឹងរុញឧបសគ្គឲ្យក្លាយជាជោគជ័យ។ បុគ្គលដែលធន់មិនបោះបង់ចោលទេក្នុងការធ្វើអ្វីមួយ។ បុគ្គលដែលធន់នឹងបន្តដំណើរទៅមុខទៀតទោះបីជាមានឧបសគ្គ ឬបញ្ហាប្រឈមច្រើនយ៉ាងណាក៏ដោយ។

ខាងក្រោមនេះជាលក្ខណៈសម្បត្តិ៧យ៉ាងនៃភាពធន់ ៖

១) ភាពធន់ទាមទារការយល់ស៊ីជម្រៅ (Resilience requires insight)

អ្នកត្រូវពង្រឹងខ្លួនអ្នកដោយសួរសំណួរជីវិតលំបាកៗ និងឆ្លើយដោយស្មោះត្រង់ជាមួយខ្លួនឯង។ ប្រសិនបើអ្នកបាត់បង់អ្វីមួយក្នុងជីវិត(សេរីភាព ទ្រព្យសម្បត្តិ ឬ ឋានៈ) អ្នកត្រូវមានភាពស្មោះត្រង់ និង ហ៊ានទទួលយក។

២) ភាពធន់គឺពឹងអាស្រ័យលើខ្លួនឯង (Resilience is independent)

បុគ្គលដែលមានភាពធន់គឹអាចពឹងលើខ្លួនឯងបានក្នុងការក្រោកឈរឡើងវិញក្រោយពេលមានវិបត្តិ។

៣) បើទោះបីជាពឹងខ្លួនឯងបាន ក៏ត្រូវមានសម្ព័ន្ធភាពជាមួយអ្នកផ្សេង (Although resilience is independent, it’s also tied to others)

នៅពេលដែលអ្នកមានការទទួលខុសត្រូវជាមួយមនុស្សកាន់តែច្រើន អ្នកនឹងមានកម្លាំងចិត្តកាន់តែខ្លាំងក្នុងការចាប់ផ្តើមម្តងទៀត – មានមូលហេតុកាន់តែធំ បង្កសកម្មភាពកាន់តែខ្លាំង។

៤) ភាពធន់ត្រូវការគំនិតផ្តួតផ្តើម (Resilience calls for initiative)

អ្នកត្រូវអភិវឌ្ឍសមត្ថភាពក្នុងការទទួលខុសត្រូវលើស្ថានការណ៍អ្វីមួយ ឬ បញ្ហាអ្វីមួយដែលកើតឡើង។ អ្នកត្រូវក្រោកឈរ ហើយធ្វើអ្វីៗទាំងឡាយចាំបាច់ដើម្បីផ្លាស់ប្តូរស្ថានការណ៍អាក្រក់។

៥) ភាពធន់តែងមានគំនិតច្នៃប្រឌិត (Resilience has an element of creativity)

ភាពធន់បញ្ជាក់ពីសមត្ថភាពរបស់អ្នកក្នុងការដោះស្រាយបញ្ហាប្រឈមណាមួយជាមួយនឹងគំនិតច្នៃប្រឌិត និង ការបេ្តជ្ញាចិត្តស្វែងរកច្រកចេញ។ អ្នកស្វែងរកវិធីសាស្រ្តក្នុងការចាប់ផ្តើម ឬស្តារស្ថានការណ៍ឡើងវិញ។

៦) បុគ្គលដែលធន់ចូលចិត្តបង្កើតភាពរីករាយ (A resilient person has humor)

ការបង្កើតបរិយាកាសរីករាយមានសារៈសំខាន់ក្នុងការផ្លាស់ប្តូរស្ថានការណ៍ និង ជីវិតអ្នក។ ប្រាកដហើយ អ្នកត្រូវមានភាពម៉ឹងម៉ាត់ចំពោះគោលដៅអ្នក និង ខ្លួនអ្នក។ ប៉ុន្តែនៅពេលបញ្ហាលំបាកមកដល់ អ្នកត្រូវចេះញញឹមទទួលយកស្ថានការណ៍នោះ។

៧) បុគ្គលដែលធន់មានសីលធម៌ខ្ពស់ (A resilient person has a strong sense of morality)

អ្វីៗដែលអ្នកធ្វើដើម្បីក្រោកឈរឡើងវិញ មិនត្រូវមានលក្ខណៈអសីលធម៌ទេ។ អ្នកត្រូវប្រាកដថា ជោគជ័យរបស់អ្នកគឺសម្រាប់បម្រើ មិនមែនទាញចំណេញពីអ្នកផ្សេងទេ។ ជោគជ័យមួយដែលចាត់ទុកថាប្រសើរ ទាល់តែជោគជ័យនោះមានអត្ថប្រយោជន៍សម្រាប់អ្នកដទៃផង។

នៅពេលដែលអ្នកជួបឧបសគ្គច្រើនឡើង ហើយអាចឆ្លងផុត ភាពធន់របស់អ្នកនឹងរីកលូតលាស់ជាស្វ័យប្រវត្តិ។ បើអ្នកមានភាពធន់កាន់តែខ្លាំង គ្មានអ្វីអាចបញ្ឈប់អ្នកបានទេក្នុងការធ្វើដំណើរសំដៅទៅគោលដៅជីវិតរបស់អ្នក។

— ដកស្រង់ពីអត្ថបទរបស់ Jim Rohn, in the Success Magazine, “7 Traits of the Most Resilient People”

— ប្រែសម្រួលដោយ សាម អ៊ីន, ឧសភា 2016

2 Comments
  1. Loeung Vannak says

    ដើមឡើយខ្ញុំគិតថាខ្លួនឯងជាមនុស្សមានសុទិដ្ឋិនិយម និងជឿជាក់លើខ្លួនឯងខ្លាំងណាស់ និងជាពិសេស ខ្ញុំមិនដែលជឿសោះឡើយរឿងព្រេងសំណាង។ ក្រោយការបរាជ័យផ្ទួនៗ ដោយសារការឈឺឆ្អាលចំពោះសាច់ញាតិរួចមក ខ្ញុំបានក្លាយជាមនុស្សងាយបាក់ទឹកចិត្តមែនទេន គ្មានការតាំងចិត្ត និងគិតខ្លីជាងមុន។ ពេលខ្លះ ពេលគិតទៅដល់អនាគត ឬឱកាសខាងមុខ វាបានជួយឱ្យខ្ញុំញញឹមបានបន្តិចដែរ ប៉ុន្តែជារឿយៗ ឧបសគ្គនៅពេលបច្ចុប្បន្នតែងរាំងផ្ទប់ក្ដីសង្ឃឹម និងវិលទៅរកការធ្លាក់ទឹកចិត្តម្ដងហើយម្ដងទៀត។ ភាពបរាជ័យ បានធ្វើឱ្យខ្ញុំបាត់បង់តម្លៃ មិត្តភក្តិ ជំនឿចិត្ត ក្ដីសង្ឃឹម។ ពេលខ្លះ ខ្ញុំពិតជាត្រូវការជំនួយពីអ្នកនៅជុំវិញដែលធ្លាប់ស្គាល់ពីមុន ប៉ុន្តែខ្ញុំសម្លឹងមើលមិនឃើញទាល់តែសោះ។ តើនឹងត្រូវស្ដារស្ថានភាពយ៉ាងដូចម្ដេច? មិនមែនមិនដឹងពីដំណោះស្រាយទេ ប៉ុន្តែគ្មានជំនួយទាល់តែសោះ ហើយស្ថានភាពដដែលៗតែងសង្រ្គប់ពន្លកនៃក្ដីសង្ឃឹមមិនឱ្យលូតលាស់បាន។

  2. Sam Inn says

    សួស្តីវណ្ណៈ

    អរគុណដែលបានអានអត្ថបទរបស់ខ្ញុំ និង មានយោបល់មួយចំនួន។ ខ្ញុំយល់ថាវណ្ណៈគួរព្យាយាមស្វែងរកប្រភេទ កីឡាណាមួយដែលវណ្ណៈចូលចិត្តដូចជា លេងប៉េងប៉ុង ជិះកង់ ឬ ហែលទឹក ហើយអនុវត្តជាប្រចាំ (រៀងរាល់ថ្ងៃ ឬ បីដងក្នុង១សប្តាហ៍) និង ព្យាយាមស្វែងយល់អំពីរបៀបធ្វើសមាធិ។ កីឡា និង សម្មាធីអាចជួយឲ្យកាយ និង ចិត្តយើងមានសុខភាពល្អ ហើយជាមួយគ្នានោះ នាំឲ្យយើងគិតបែបវិជ្ជមាន មានក្តីសង្ឃឹម និង បង្កើនជំនឿជាក់។ ជូនពរវណ្ណៈគ្រប់យ៉ាង។

Comments are closed.